Stúlkurnar í fjórða flokk kvenna hafa nú lokið keppni á Goðamóti Þórs sem fram fór um helgina á Akureyri.  Eins og áður sagði hér á síðunni fóru 2 lið til keppni, annars vegar í keppni B liða og hinsvegar D liða. Stúlkurnar áttu leiki á föstudag og byrjaði B liðið mótið af krafti og lagði annarsvegar KA 1 - 0 og hinsvegar HK 2 - 0.

D liðið átti leik gegn Breiðablik og tapaði 2 – 5. Það voru því þreyttar en sáttar stúlkur sem lögðust til hvílu í Glerárskóla að kvöldi föstudags eftir velheppnaða ferð í keilu á Akureyri.

Laugardagurinn var heldur erfiðari fyrir Skallagrím, D liðið tapaði gegn Fjölni 1- 3 og Völsung 0 - 3. Lék svo í undanúrslitum liða 5 – 7,  gegn Tindastól og tapaði þeim leik einnig.

B liðið byrjaði daginn á því að tapa gegn Fjölni 1- 2 en gerði svo síðar um daginn jafntefli 3 - 3 gegn KS/Leiftri og það þýddi að Skallagrímur lenti í öðru sæti í sínum riðli einu stigi á eftir Fjölni.

B liðið var þá komið í undanúrslit liða 1 – 4  og átti leik gegn efsta liði hins riðils B liða sem var Breiðablik og skemmst er frá því að segja að Breiðablik vann þann leik 0 -  3. Heldur skrykkjóttur dagur en skemmtilegur.

Sunnudagurinn var okkar stúlkum hliðhollari og kom í ljós eftir undanspil að D liðið átti að etja kappi  við Samherja og er skemmst frá því að segja að okkar stúlkur rúlluðu upp þeim leik og lentu í 7. sæti.

B liðið fékk Fjölni sem tapaði undanúrslitaleik gegn Þór og nú voru okkar stúlkur á tánum og ætluðu ekki að tapa gegn Fjölni aftur og sigruðu örugglega 4 - 1 og enduðu því keppni í 3ja sæti B liða á Goðamóti sem er mjög ásættanlegur árangur.

Þessa helgina stendur yfir Goðamót Þórs á Akureyri fyrir fjórða flokk kvenna. Um það bil 340 stelpur taka þátt í Goðamóti 4. flokks sem hófst í dag í Boganum og lýkur á sunnudaginn. Liðin eru 38 frá 16 félögum. Sautján stúlkur frá Skallagrím ásamt þjálfaranum Birni Sólmar eru nú á Akureyri og keppa í Boganum í tveimur 7 manna liðum.  Hér má nálgast allar upplýsingar um mótið, úrslit koma fljótt inn sem og myndir.  http://godamot.blog.is/blog/godamot/

Tveir sundmenn frá UMSB þeir Jón Ingi Sigurðsson og Alexander Gabríel Guðfinnsson kepptu í sundi á Reykjavík International Games um helgina í flokki 15 ára og eldri. Um 100 erlendir sundkappar tóku þátt að þessu sinni og fjölmargir Íslendingar. Af erlendum sundmönnum má t.d. geta Alexanders Dale Oen sem að er silfurverðlaunahafi í 100 bringu á OL í Peking.

Æfingar hefjast skv. dagskrá 11. janúar

Helgina 15.-17. janúar fer fram Reykjavík International. Mótið er lágmarkamót og HÉR er upplýsingasíða leikanna. ATH. Skráningum þarf að skila til Hafdísar fyrir 8. janúar.

Sælir foreldrar og iðkenndur frjálsra.

Þá fer að líða að jólafríi hjá okkur.

Miðvikudaginn 16.des ætlum við að gera okkur glaðan frjálsíþróttadag. Þá er síðasta æfing fyrir jólafrí og eiga allir iðkendur og þjálfari að mæta í einhverju RAUÐU eða með eitthvað rautt. Tekin verður stutt æfing og svo gerum við eitthvað skemmtilegt saman.

Við byrjum svo aftur á fullu miðvikudaginn 6.jan 2010.

Foreldrar knattspyrnubarna

Vinnufundur 1. desember 2009, kl. 19,30 í Menntaskólanum.

Nú er komið að því að halda áfram með stefnumótunar- og skipulagsvinnuna sem við byrjuðum á um daginn. Þeir sem ekki komust á fyrri vinnudaginn geta auðveldlega komið inn í vinnuna núna.

Mætum sem flest og höfum áhrif á stefnu og uppbyggingu félagsins okkar.  

Skallagrímsstúlkur léku á móti Fjölnisstúlkum í 1. deild mfl. kvenna í gær í Dalhúsum í Grafarvogi.  Skemmst er frá því að segja að Skallagrímsliðið var langt frá sínu besta og skoraði m.a. aðeins 14 stig í fyrri hálfleik.  Heldur sóttu þær í sig veðrið í síðari hálfleik en úrslitin urðu 69-47 fyrir Fjölni.  Stigahæstar voru Gunnhildur með 15 stig, Helena með 12, Hugrún með 6 og Rannveig 5.  Skallagrímur tapaði naumlega móti Fjölni í heimaleik hér fyrr í haust og ljóst að á góðum degi geta þær veitt þessu efsta liði 1. deildar harða keppni.  Sunnudaginn 6. desember fá Skallagrímsstúlkur einmitt Fjölni í heimsókn í 16 liða úrslitum Subwaybikarsins.  Skallagrímsstúlkur verða að sýna sínar bestu hliðar á sunnudaginn ætli þær sér sigur.  Leikurinn er í íþróttamiðstöðinni í Borgarnesi n.k. sunnudag og hefst kl. 17.00

Tryggingafélagið Sjóvá afhenti í dag Knattspyrnudeild Skallagríms endurskinsvesti að gjöf sem eru ætluð þeim knattspyrnuiðkendum sem stunda útihlaup  meðfram hefðbundnum knattspyrnuæfingum innan vallar.  Stelpurnar í 4. flokki hlaupa úti á undan hverri einustu knattspyrnuæfingu og oft hlaupa þær um bæinn. Þar sem svartasta skammdegið er skollið á voru stelpurnar vart sjáanlegar meðfram götum bæjarins en nú verður breyting þar á, og má nú búast við að sjá  kyrfilega sjálflýsandi fótboltastelpur á hlaupum  um bæinn á næstunni.

Knattspyrnudeildin þakkar Sjóvá

Á myndunum má sjá  Björn Sólmar taka við vestunum  úr hendi Kristínar Jónsdóttur í Sjóvá. og  hópinn klæddan vestunum fyrir utan útibú Sjóvá í Borgarnesi 

Nýr sundþjálfari hefur bæst í hópinn en það er hún Laufey Sif sem að er sundkona og hefur reynslu af sundþjálfun.