Æfingamót Skallagríms

Síðastliðinn laugardag hélt Skallagrímur lítið æfingamót fyrir 4. flokk karla í Akraneshöllinni. Liðin sem mættu til leiks voru öll af Vesturlandi en auk Skallagríms voru ÍA og Snæfellsnes með lið. Mót sem þetta er fyrst og fremst hugsað til þess að hinir ungu leikmenn fái æfingu í að spila á stórum velli þar sem stór hluti þeirra er að spila á slíkum velli í fyrsta sinn. Leikar fóru þannig að Skagamenn gerðu jafntefli við Snæfellinga, 2-2 í fyrsta leik. Síðan léku þeir við Skallagrím og töpuðu 2-4. Lokaleikurinn var svo milli Skallagríms og Snæfellinga og endaði hann með öruggum 6-2 sigri þeirra síðarnefndu. Það voru síðan Snæfellingar sem fengu verðlaun fyrir prúðasta liðið. Drengirnir voru ansi þreyttir eftir 100 mínútur af fótbolta en leikir sem þessir eru nauðsynlegir í reynslubanka þeirra.